Køp ni gïn raany Anywaa bäre en ajoot.
Lööngö köö, “ni gïn raany wï jur en ajoot.”

Lwaa thiinh aköö, “ni gïn dhïër jøw en ajootge.”
Jäle köö, “ni gïn raany lwaa thiinh en ameenyge.”
Cï dëëre köö, “ni gïna päth jøwi ree aløny ni weiye teek.”

Kanya rööp dööti, jammi angwien ajoot.
Lööngö köö, “ni gïna raany kööngngö,
Aciel, beeye athammi noo meenø ni bäär en,
Atham wø twöc ni caala lweeta dwøng ni wø tïïc wïc ni raac,
Atham omeer jiyi ki gø ocar luup ni jøw dhaaw,
Atham lwaa thiinh ni wø køp ni nyootha bëët ööny maal,
Athammi ni tïïc olääde na kuuwe mo owär di poge en.”

Lööngö köö, “ni rietgi beeye abïïna näk odhøth piny ni thuur-guth nëënø wøk,
Abïïn lwaa thiinh en, na tïïc ni ngwaalla bëët jøøa Ameerika,
Abïïna näk gäärø ki yi ngøøm ki mar thøøra ajääp.”

Lööngö köö, “ni däägi, beeye abïï nyïï na näk peelø owii wøk, na cienk na no nirep roo otweengi.
Abïïna näk nyïïulät mään geno tïmö ni gi ba løny ki pwöyö jï wëëkgi ki mïëkgi kipere,
Abïïna näk abïï laangø ki lwøllø dï paac,
Abïïna näk ni kööm jøw, luubø jøl ni ’Cïït! wïïe owaang’”

Ngweerge, akøp ni beeye maadhi no dääö na apoole ki cwøw oreeth ree en,
Ni beeye køøngnga näk bung pïïn piny paac dï kal,
Køøngnga näk cøw ee daa dï paac køør lwøllø.

Køøngnga näk nyeng jiy ee mooø ki pööc,
Køønga näk dhøk jiy ee näk cweeth ni kwaar.

Køøngnga raac na näk gwel ee thöör wøk, ni no tïme na amööla beeye maac ki bïri yïth bïïre,
Køøngnga raac näk cwøw ki mään ee mänø ki kïth nyïïgi uut-gööri mo beyø.

Køøngnga thöör jøw na nyooth jöör täw remma tar -HIV/AIDS
Køøngnga cängngi ki nyeng, ki paae, ki cäng wat yi paac.
Køøngnga tïïc jaara dwøng ni maanga thur tïëng nyaare.

Bïïgi, akøp ni beeye ajiema dwøng na raac na pää jiy;
Ajiem göör ki kwär, ki ajiem bär ki cïëk,
Ajiem dhøk jure ni beeye ajiema raac na thøw jiyi kigø.

Ba na tïme kere duut thum, Lööngö wïïë pare ni kööe,
“ni bïciet gïn raany jøw en, beeye ajeeny wøny KEEC,
Ajeeny wøny JÄK, ajeeny Wøny BUNG NGÄÄTH RØK,
Ajeeny na näk jïëc tïïë thööth na thuunh cwøwyi ki mään këël dï cängi en,
Ni beeye ajeenya näk ree ee døøk awanga-maac ri jøw.

Ni ö duuti ni athum piny ki pwöc ni caarø wïthø nyïïmïë.

Ngat göörgø beeye Puurrö Nyigööni ki Sudan pääny mana cwøl ni Renk. Eni di joodø ki bäät ajääp man: ajwara_puro@yahoo.com