Lööngö akö, ‘Ki atïmö ni teek møn, atïmö ni teek møn døc,

                      Øw aruu cäng apädhö ki accare moa bëët,

                      Atïmö ni teek møn”

Atïmö ni teek møn dëëra Anywaa; øw aruu Anywaa ogøø ki maac, Anywaa ocwøbø ki caakïn, Anywaa ocaamø ki jaath, Anywaa owëëk thøø øt-jaath, Anywaa wïïe ongul wøk thääng jöö wala Anywaa thäärö yi naam yi Opëënö.

Ø caannø ngø? Amïn dut kiper nee ø ba kïth øt-tööc? Ø cäänö ki tööt kiper nee dhaanhø ba näk wala nee dhaanhø jïtï ki kwäär bang gäla di yøø?

Anywaa wïïe ngøla wøk oleengi yi opëënö ba moa en wøk na do caan adïëri, adïëri wecgi wiiø. No tïme na amööla dhaanhø ena bäät radiø mar gäla ni caana gø ni gäla bung gïn mo raac mo ee tïïö dëëra Anywaa. Anywaa bëëdö ni yie met jaak yi ngööm Anywaa.

Øøno jwørø ngø nø? Ni näk mo cøku di nääö okooth tieri kawaat man wø tïïc jïëö okac tier dhaanhø ocäkgø kooththø kiper nee ba jwøri. Ba ka adiëri møn, yïï ni bëëdö niï thøththa lak akwöm gäla enø, nee bëëde ni nyämö ki Anywaae, ii caarø ni yïï ba nyame thuwø dicäng aciel kanyo tïme ni bung Anywaa mo di nyamø këët?

Gïr piny agïna ngø dëëra Anywaa? Ni näk mo beeye many kwär, kwär ba do manynyø ki raany jwïëc jiy. Ni näk mo Anywaa thum ni thum ni jøw manynya kwär; anga no kääri na Anywaae ii nø thöör? Dïcängi kwär joot ni yïï jiera jø poo. Ba ni näk mo jø poo ii nø cïp no olämi jï gäla kiper ni jïtï ki kwär, yïïno jieri nga? Ki jïra ni tïmö na lääk jï dhaanhø.

Wäät paac, lïngngö kär jierø kiper mano tïme ni ø di tööyö. Theemma tööc ki thøø. Jur okööng ni eni dïdö ki wïïa Anywaa nee ngøøpe came. Do theemma eni ki ma pääth dhaanhe ki nguure, ki man thøw dhaanhe ni jääk. Dhaanhø thøw ki thøra ba manygø nee dee owäng jï dhaanhø. Gïn mo di koorø mo öö ki wøk wala mo päänhnhø ki maal bunggø. Jammi bëët tïïya dhaanhe. Ni näk mo ø jiera lïngngø, jur pa jur mo døøa ngääë kiper mano nhønhnhø tiette.  Beer man öö maal ki jöö mana løny jïïö opiemø røø.

Wäälö man gööra Ojulu Odöla. Løny ki man jooti eni ki bäät ajääp: ojulu@optusnet.com.au