Angø di jaay, gïn wïnynya en kare?

Wala ajoota gïn mo ojal, wala apara wïïa ki moa jooda thïnhø?

Nyëë jaay, awïnynya ni ngøøm ni lwør Gambëëla yøø këë,

Nyëë Jaay, awïnynya ni ngøøm ni lwør yi Awettabala-Pocala yøø këë,

Nyëë jay, awïnynya ni ngøøm ni lwør yi Akööbø yøøkëë.

Køp ni jur thïmma dëëre ni Anywaa ba jänne,

Cwöw moo këël nyeng-gi piny, gi leenga naam,

Ni moo køp gïr rwääny wïïa Anywaa, gi di tïïö ki øny.

Køøre aana cädø døøc o døøa yia, ni Kööa, “ni mana pänhnha agwäye ee, wala beeye gïn wø duu kwänynye ka ajeeny ki jäk?”

Ni øw kär ruu awïnynya maya ni lul apøtti jïïu odhøøngngi ,

Ni ö warki ki pwöththa dwøng ni muuy jï kwääri.

Na cäng øwi maya ruuwø, awïnynyagø ni käc dagø po Anywaa,

Ni cam ba løny ki  geew jï wëëk mïëri.

Angø jaay, Jur wïë piithi nga cøn, ni put Anywaa tïïc kaamar pääm nyï-kweenhnhe en?

Ni näk beeye thïnh göör, karø poot en kany mo nyïëdi icenø; ø poot ba pïï nø?

Ni näk beeye bung gwelø, karø poot en kany mo nyïëdi icenø; ø poot ba kwär thuwø?

Ni näk beeye ajeeny, karø adee poot en kany mo nyïëdi icenø; ø poot ba jøøl ki jeeny røgø en?

Jaay, yia anyithay ki mar bøøng olïïru,

Jaay, yia arëëm na bäre bäre.

Eni ee, bung gïn mo u rööpa ree mo  gööru ka piny bäre cøn ennø?

Wïth juure bëët, jïge da luup ma mo wï cwöt mo gøøga geni,

Ni wïth juure bëët, jïge da luup mo bwöththa geni ki jöö man bëëtgi kigø ni gi kwøw bäät piny.

Angø jøw… nyëë jø powa?

Wï jur dïwønga eni ki jap dëël, ki wïny nyeng bang jøøa path,

Luum cwøw ki jiem dëël, jøw rwäänye rwäänyö na bäre bäre.

Dwalø acaare moø kiper piem wï jur cwiini,

Mööc göör ki kwär manynya wec,

Gena ngïï mo nyoththa dööngngø cään!

Kär ø dhïërø ki ngat dëëny, ki ngat tong,

21^st Cenyceri cwøw böödø ka peen, ki owäng, ki dïplömaci,

Dwalø jap wø wïnynyø dëëttø ki geni kiper piem jur ki wï jur.

Kee na Köö ee, “na angwaala na toor baam odïëk, yøø ngwaalø nidïï?

A na toor baammi nø bøø, odïëk bëëde nidïï ennø?

Løny ki man tïm ööl po Anywaa ni täga raa ngwaala,

Wala öölø  bade dïwøng cøøn en?

Ki banga bee, ni näk ma angwaal odïëk tøya tiel, a doo köö, “na Anywaa man thiinh en tïme ni ngwaala køør kwari na bëëdø  ni teek”,

Ka ø ngwalla køøt jøøa døøngngø cøn bee; teek mar Anywaa ba do räänynyø.

Køøre mano caana nø, Anywaa man na beenhnhø man thiinh en, manynyagø nee køør kwari ngwaale,

Nee TEEK DUU PAAC po Anywaa,

Nee bunge jur mo kera jiy wøk kaamar lwangngi mo ena bäät køøngø yi ngøøm jøw,

Nee gïna køp kwäri, “ni Anywaa nyi lwiinh-jwøk” nee nwöye røø thuwø.

Ngata Göör luubö man beey Puurø Nyigööni Caam. Eni løny ki man joodi bäät email: ajwara_puro@yahoo.com